Mensendieck og barnakonur

Ein mensendiecklærari er serkønur í kropsburðinum hjá barnakonum.
Tú fært frálæru í júst tínum kroppi, samstundis sum vit gera serligan barnakonufimleik og føðifyrireiking.
Mensendieck fimleikur fyribyrgir kokuloysn. Hevur tú longu kokuloysn gera vit venjingar sum hjálpa.
Mensendieck fimleikur fyribyrgir deildar búkvøddar - rectus diastasis. Hevur tú longu deildar búkvøddar, lærir tú at venja teir, so teir koma saman aftur.

Frálæran er á smáum holdum, 1/2 tíma um vikuna, í mesta lagi 3 barnakonir á hvørjum holdi. Vit byrja hold allatíðina. Møguleiki er eisini at fáa einatíma.

Mensendieck fimleikur er eisini sera væl egnaður, aftaná at tú hevur átt. Jú fyrr, tú byrjar eftir føðing, jú skjótari fært tú kroppin inn aftur í javnvág. Les eisini her.
Melda til á 515755 ella mensendieck@mensendieck.fo

Búkvøddar og barnakonur

Búkvøddarnir hava altíð týdning í sambandi við rættan kropsburð. Hjá barnakonuni hava teir enn størri týdning, tí teir skulu bera størri byrðu enn vanligt.
Veikir búkvøddar og vánaligur kropsburður gera, at liðbandið millum teir longu búkvøddarnir - linea alba - fer óneyðuga nógv sundur, so úrslitið verður deildir búkvøddar - rectus diastasis.

Mensendieck fimleikur fyribyrgir deildar búkvøddar. Men um teir longu eru deildir kunnu teir eisini venjast á ein sera einfaldan og lættan hátt. Ongi ´sit-ups´ sum økja  trýstið í búkholuni, eingin møði og eingin pína í ryggi ella nakka. Aftaná føðingina nýtist tær ikki at ganga við dýrum belti fleiri tímar um dagin. Tú lærir eftir fáum ferðum at nýta búkvøddarnar á ein náttúrligan hátt, so tað ikki er neyðugt at gera nógvar dagligar búkvødda venjingar.
Við okkara máta fer linea alba ikki óneyðuga nógv sundur undir graviditetinum, og aftaná føðing er skjótari og lættari at venja búkvøddarnar aftur.

Tú lærir at kontrollera búkvøddarnar so tað undir føðingini gerst lættari at spenna ella avspenna teir eftir tørvi. Sí eisini meira nágreiniliga um búkvøddarnar undir skeið í búkvøddum.

Barnakonur og kokubotnurin

Tú lærir at venja kokubotnin 1. til at halda ímóti vektøkingini í búkholuni og 2. at spenna og avspenna kokubotnin eftir tørvi. Tað er sera hent at duga at stýra kokubotnsvøddunum undir sjálvari føðingini, so hon gerst lættari.
Eisini fyri kokubotnsvøddarnar er galdandi, at jú fyrr tú byrjar at venja teir, jú lættari er at fáa fatur á teir aftaná føðing, tá teir skulu venjast uppaftur. Sí eisini skeið í kokubotnsvøddum.

Mensendieck føðifyrireiking allar 9 mánaðarnar

Byrjað føðifyrireikingina so tíðliga sum gjørligt og varðveit góðan kropsburð alla tíðina meðan tú ert við barn. Jú fyrr jú betri, men tað er tó ongantíð ov seint at byrja. Teir vøddar, sum man hevur vant áðrenn føðing, eru lættari at finna og skjótari at venja uppaftur aftaná føðing. (Les eisini hvat Kristina sigur her). Saman við serligum barnakonuvenjingum verður eisini tikið atlit til tørvin og kropsburðin hjá hvørjum einstøkum. Tú lærir at stýra vøddunum og andadráttinum undir sjálvari føðingini. Tað kann gera føðingina lættari.

Andadrátturin broytist

Kroppurin hjá barnakonum broytist fysiologiskt, anatomiskt og hormonelt. Vektin í búkholuni økist umframt at eginvektin hjá mammuni økist.
Broytingarnar gera at kroppinum tørvar størri iltnøgd.

Kroppurin lagar seg anatomiskt eftir broytingunum.
Men óynsktar broytingar kunnu eisini henda, til dømis um ov stórt svaj kemur í ryggin orsakað av óvandum búkvøddum (sí eisini undir búkvøddum omanfyri) við tí úrsliti, at bróstkassin fær verri kor, so tað gerst strævnari at anda.
Óynsktar broytingar kunnu fyribyrgjast við at venja kroppin inn í javnvág og at venja og styrkja andadráttsvøddarnar.

Haraftrat venja vit eisini serligan føði-andadrátt so bæði mamma og barn fáa eina lættari føðing.

Blóðrenslið/Venu-pumpan

Blóðrenslið hjá barnakonuni ávirkast eisini meðan hon gongur við barninum. Serliga munnu nógvar barnakonur merkja at kroppurin hovnar, og at kanska serliga beinini kennast tung og hovin. Vit gera nógvar venupumpuvenjingar, sum fær gongd á blóðrenslið - eisini venjingar, sum tú sjálv kanst gera heima, tá tørvur er á tí.

Kokuloysn

Hví fáa summar barnakonur kokuloysn.
Tað er náttúrligt at liðbondini loysna fyri at gera kroppin kláran til føðingina. Men ójavnvág í kropsburðinum orsakað av skeivum kropsbrúki og/ella viðføddum skeivleika kunnu viðføra at liðirnir í kokuni loysna ymiskt og úrslitið kann gerast kokuloysn við nógvari pínu.
Mensendieck fimleikur er sera vælegnaður til kvinnur við kokuloysn. Umframt at vit styrkja vøddarnir sum halda kokuni í javnvág, rætta vit kropsburðin so allir liðirnir í kroppinum koma í javnvág. 
 

Eftir føðing

Tað er týdningarmikið at koma skjótt í gongd við at venja vøddarnar aftur aftaná føðing. Á tann hátt fært tú skjótari tín egna kropp aftur, og kanska í eini enn betri útgávu. Um føðingin hevur verið uttan trupulleikar, er ikki neyðugt at halda pausu. Man kann byrja at venja beinanvegin.
Í eftirføðingar fimleikinum arbeiða vit serliga nógv við kokubotninum og búkvøddunum, tó allatíðina við atliti til allan kroppin.
Eisini venja vit bestu arbeiðsstøður td í samband við bróstageving, so tú sleppur undan óneyðugum vøddaspenningum.
Barnið er vælkomið við :-)
Tú ert vælkomin til mensendieck fimleik eftir føðing, hóast tú ikki hevur gingið til mensendieck føðifyrireiking.